સુરત ગ્રામ્ય એલ.સી.બીનું ફિલ્મી ઓપરેશન ગુજરાતમાં તરખાટ મચાવનાર મોહનીયા ગેંગના ત્રણ રીઢા આરોપી ઝડપાયા

રિપોર્ટ - મયુર ગોહિલ સુરત 

સુરત ગ્રામ્ય પોલીસને લાંબા સમયથી વિવિધ જિલ્લાઓમાં થયેલી ઘરફોડ ચોરી અને લૂંટના ગુનાઓમાં આ ગેંગની સંડોવણી અંગે માહિતી મળી રહી હતી. પોલીસ મહાનિરીક્ષક પ્રેમ વીર સિંહ અને પોલીસ અધિક્ષક રાજેશ ગઢિયાના માર્ગદર્શન હેઠળ એલ.સી.બી ટીમે ટેક્નિકલ સર્વેલન્સ અને હ્યુમન ઈન્ટેલિજન્સના આધારે સઘન તપાસ હાથ ધરી હતી.તપાસ દરમિયાન પોલીસને ચોક્કસ બાતમી મળી હતી કે કામરેજની સોવરીન બંગ્લોઝમાં થયેલી ચોરીના આરોપીઓ દાહોદ જિલ્લાના ધાનપુર તાલુકાના ઉંડાર ગામમાં છુપાયેલા છે. આરોપીઓ રાત્રિના સમયે જ ઘરે આવતા અને પોલીસથી બચવા માટે પાલતુ કુતરાઓ રાખતા હતા જેથી કોઈ હલચલ થાય તો તેઓ તરત જ ડુંગરા અને કોતરોમાં ફરાર થઈ જાય.આ માહિતીના આધારે સુરત ગ્રામ્ય એલ.સી.બીની ટીમે મોડી રાત્રે સ્પેશ્યલ ઓપરેશન હાથ ધર્યું. અલગ અલગ ટીમો બનાવી ડુંગરાળ વિસ્તારમાં આવેલા મકાનો ઉપર એકસાથે છાપો મારતા દિલધડક ઓપરેશનમાં ત્રણ આરોપીઓને દબોચી લેવામાં આવ્યા.

પકડાયેલા આરોપીઓમાં દલીયો ઉર્ફે ગાંડો કાળુભાઈ મોહનીયા અને દિલીપ ઉર્ફે દીલો કાળુ મોહનીયા સહિતના આરોપીઓનો સમાવેશ થાય છે. પૂછપરછ દરમિયાન આરોપીઓએ સમગ્ર ગુજરાતમાં લૂંટ, ધાડ અને ઘરફોડ ચોરીના અનેક ગુનાઓ કબૂલ્યા છે.આરોપીઓએ કામરેજની સોવરીન બંગ્લોઝમાં રાત્રિના સમયે ચોરી કરી હતી અને એક મહિલા જાગી જતા તેને મારી નાખવાની ધમકી પણ આપી હતી. ઉપરાંત બારડોલીના ઇશરોલી અને અસ્તાન ગામોમાં પણ બંધ મકાનોમાં ચોરી કરી રોકડ રકમ અને ચાંદીની લગડીઓ ચોરી હોવાની કબૂલાત કરી છે.પોલીસ તપાસમાં ખુલ્યું છે કે આરોપીઓ સામે ગુજરાતના વિવિધ જિલ્લાઓમાં ૧૫થી વધુ ગંભીર ગુનાઓ નોંધાયેલા છે. અગાઉ જામીન પર છૂટ્યા બાદ તેઓ કોર્ટમાં હાજર રહેતા ન હોવાથી તેમના વિરુદ્ધ ધરપકડ વોરંટ પણ ઇશ્યૂ કરાયા હતા.હાલ સુરત ગ્રામ્ય એલ.સી.બી દ્વારા ત્રણેય આરોપીઓ સામે વધુ કાયદેસરની કાર્યવાહી હાથ ધરવામાં આવી છે.